Pangu Language Project

Thank you for your interest but we are sorry that this website is no longer being updated. Please connect with us on our Facebook page pangu.info
https://www.facebook.com/pangu.info

Uhwe̱n na 21 na̱ pyanda na hin reenu na koya̱ yo̱, aba ta nda umuntun na hwe̱n na ta̱ce̱pe̱ na̱ duuniyan. Arin nda̱tu, xta̱nje̱ ma tuma na̱ ubwa hwe̱n ya̱nu, ta̱mata̱ma̱nrinyin ta̱hyan ta̱ce̱pe̱ ta̱nda̱a̱tu.

Too, yansun ma ta̱hyan na̱ koya̱ maako ta̱ce̱pe̱ ta̱ka̱ ta̱ta naa ta̱ꞌwi na̱ duuniya. Uzumaa na hyan ta̱naa cita̱a̱ga̱ga̱ mꞌmwaan nꞌnda̱a̱tu ta̱ce̱pe̱ ta̱nda̱a̱tu wana ta̱ta jaa ꞌwi, haku ta̱yaan ta̱ce̱pe̱ na̱ta̱ hoo ꞌwa̱. Kusu, xta̱ta hakata ta̱nda̱a̱tu ta̱ꞌwi haku ta̱yaan ta̱ba ꞌwi.

Na̱ hwe̱n na 14/12/2020 ga̱tu tanje̱ ta̱maha̱nga nata̱ ta̱taga na̱ꞌta̱cita̱ga̱ Ta̱rin na̱ Unguwan Mamman. Aba awyatu atacita̱ga̱ ca̱a̱sa̱, na nꞌta̱citaga̱ mazama nama cigi, na̱ nꞌta̱taga ta̱ꞌyantan na̱ allo. Ubwa ya̱nu tuma tashi nahyan ta̱zhimbahini awyatu na hyan are̱ iyeebe na nꞌta̱naa taga ta̱ꞌyantan.

Uhwe̱n ta̱nguni.

Arin nda̱tu, ta̱a̱zumani ma na̱ nꞌta̱riini uyo̱ na fo̱ na ga̱tu tanda̱ba ta̱maha̱mba̱ga̱ na̱ ce̱nye̱n ta̱nda̱a̱tu Najeeriya. Na̱ hwe̱n na ka̱ na̱ pyanda na hin upwa na̱ yo̱ dubu ka̱ na nꞌyina̱ nꞌta̱ndushi na̱ kuje cininhin (1/10/1960) ta ga̱tu tanda̱ba ta̱maha̱mba̱ga̱. Ba̱re̱ ta̱mꞌmꞌbaa nꞌyo̱ kuje cininhin (60). Uhwe̱n ta̱nguni.

Hwe̱n na ba̱re (8/9/2020) ta shi uhwe̱n na ta̱matamanrinyan ta̱taga na̱ nꞌta̱cita̱ga̱ nata̱ ta̱koya̱ ta̱ce̱pe̱. Uzumaa koo buya̱ buꞌmꞌbaa ta̱yansun nata̱ ta̱taga na̱ nꞌta̱ce̱pe̱ ta̱ndaabwa, wana hyan u-shi bunaa nii zhimbahinaa awyatu ana ga̱hin kuci ta̱ce̱pe̱ ta̱ka̱ na̱ aba, ayansun taa imbata nii nda na̱ sa̱ra̱ri kope aba ne̱e̱.

Ta̱gooji.

Awyatu nda̱tu, iyan ta̱hyan ta̱re̱ iyeebe ta̱naa ga̱gaagana awyatu na̱ Unguwan Mamman. Ta̱ga̱ga̱a̱ga̱ni wyan haruwa na ta̱taga na̱ nꞌta̱cita̱ Ta̱rin. Ta ga̱tu de̱be̱ ana a̱ri ta̱taga na̱ nꞌta̱cita̱ga̱ kana ga̱tu ga̱ga̱a̱ga̱ni.

Ku-Hwe̱n shani ga̱tu maka̱nta̱ni ta̱nii huwa̱ mꞌmwaan ta̱ga̱gaagana na̱ pyanda na̱nna. Ta̱hoo huwa̱ ta̱ga̱gaagana nata̱ awyatu o̱to̱ na̱ nꞌhwe̱n na nꞌhuri. Ama koo ta̱hwii, nꞌwya̱ra̱mi nꞌne̱e̱ na nꞌga̱tu ga̱ga̱a̱ga̱ni, mꞌba ta nii re̱ iyeebe nꞌta̱naa ga̱gaagana wyan.

Na̱ hwe̱n na 17-20 pyanda na hin 06 na̱ yo̱ 2020 ga̱tu tanda ta̱mawuna̱na̱ na̱ Tegina. Ta̱taga̱gaagana wyan haruwa na ta̱taga atakaada ki, na̱ haruwa na ta̱ꞌa̱sa̱a̱ga̱na̱ ta̱ba ta̱ꞌyantan ki. Wana koo ta̱ya̱ ta̱taga gaa ta̱gi ta̱zumaa, ta̱naa yoo paaku ta̱naa cita̱ga̱ tuun.

Na̱ awyatu 10 ga̱tu tanda ubwa tuma, aba awyatu atabáni Pangu Gari, na̱ Unguwan Mamman. Uhwe̱n shani anii re̱ iyeebe ta̱na̱a̱ taga ta̱ba ta̱ꞌyantan, wana hyan ta̱jaa de̱be̱ aca̱a̱sa̱ na ga̱tuu nda atakaada na ba iyeebe.

Uhwe̱n na Asupi 26/10/2019 ga̱tu tanda ta̱mawuna̱na̱ na̱ makaranta nama Tegina na hyan Arin duwa̱ni ta̱kai na̱ tuma na Ta̱rin, anaa gura̱a̱ ga̱gaagana awyatu kopee. Ta̱mawuna̱na̱ ta̱ta sha nata̱ awyatu 3 aba tajábagi nꞌko nꞌko aba tági ta̱ꞌyantan nata̱ cima na nꞌgapa na̱ na mba̱sa̱ra̱ uya̱ ta hura̱hina̱ butu iyeebe maza (debate). Buka̱ bwa cita̱gi mazama haruwa na aba tanje̱ sa̱ ta̱wya̱ri nata̱ Arin ta mꞌmagwashe̱.

Iri na shani ya̱nu ta̱mawuna̱na̱ be̱ tashi na hyan ta̱máni aha̱nka̱ri na Arin xare̱ iyeebe tanaa cita̱ga̱ nꞌta̱taga Ta̱rin.

Kuu-ribi ta̱ndaya ahooto hwarapi, antana paan.

Awyatu nda̱tu Arin, ta̱nrwaagi kam?

Hwe̱n na ba̱re 17/09/2019 ushi hwe̱n na ta̱ga̱da̱ri na̱ Arin wana ba̱re ta bugwamaa nda̱tu (Hakimi Majanjan) bwa ra̱a̱ takaada ndaabwa na ta̱pasa tuma.

Ta̱ngooji Hwe̱n. xMashi kunnu.

Mazama nama zumaa! Kuu-mꞌbaa uwaya na “Android smartphone”, bu-nii ara ta̱naa cita̱ga̱ na̱ nꞌta̱shiraga atakaada aree ꞌye̱n.

Bu-nii ara ta̱shápi, u-shii atakaada na Ta̱rin na̱ ame̱ na “app” na waya na “Android”. Bu-nii ara ta̱cita̱ga̱ atakaada ree na̱ ahooto, gaa ara u-shiraga ta̱ꞌyantan nata̱ baa cita̱ga̱ni.

Uhwe̱n shani bu-hange̱ masuunran nama “app” yana. Kusu, ta̱ribi u-hoosa̱ga̱ni awyatu nda̱tu Arin hyo̱. Uyaan hwe̱n ta̱nii gura̱a̱ duwa̱na̱ ayaan takaada, ga̱tuu bisa̱ ma uhwe̱n na ga̱tuu sha̱a̱ta̱na̱ iyaan.

Shápi, u-shii (download & install) bwa APK na ne̱e̱ niina (5.2 MB) paan kanna:

https://tiny.cc/PanguBooks